യാക്കൂബ് മേമന്റെ വധശിക്ഷയെ സംബന്ധിച്ച്

യാക്കൂബ് മേമന്റെ വധശിക്ഷയെ സംബന്ധിച്ച് സമൂഹത്തിൽ അറിയപ്പെടുന്നവരും അല്ലാത്തവരുമായുള്ളവരുടെ അസ്ഥാനത്തെ ധാർമ്മികരോഷപ്രഹസനം ലജ്ജാകരമാണ്‌. ശശി തരൂർ, മാർക്കണ്ഡേയ കട്ജു തുടങ്ങിയവരുടെ പ്രസ്താവനകൾ എന്തു ലക്ഷ്യം മുന്നിൽക്കണ്ടുള്ളതാണെന്നും അവർക്ക് രാഷ്ട്രത്തോടുള്ള പ്രതിപത്തിയും നിയമവ്യവസ്ഥയോടുള്ള ആദരവും എത്രമാത്രമെന്നോ ചിന്തിച്ചു പോകുന്നു.

ശശി തരൂരിനെക്കുറിച്ചു ചിന്തിച്ചാൽ, ഐക്യരാഷ്ട്രസഭയുടെ സെക്രട്ടറി സ്ഥാനത്തേക്കു മത്സരിക്കുക  വരെ ചെയ്ത ആളാണെന്നാണ്‌ അദ്ദേഹത്തിന്റെ വാക്കുകളുടെ ആധികാരികത സ്ഥാപിക്കാൻ ചിലർ എടുത്തു പറയുന്നത്. ഐക്യരാഷ്ട്രസഭയുടെ സെക്രട്ടറി സ്ഥാനത്തേക്കു മത്സരിക്കുകയോ, സെക്രട്ടറി തന്നെ ആവുകയോ ചെയ്യുക എന്നത് ഭാരതത്തിന്റെ നീതിന്യായ വ്യവസ്ഥയെ ചോദ്യം ചെയ്യാനുള്ള അധികാരമാകുന്നില്ല. ഭാരതത്തിലെ ഏതൊരു സാധാരണ പൗരനുമുള്ളതിൽ കവിഞ്ഞ യാതൊരു പ്രത്യേകാവകാശവും ജുഡിഷ്യറിക്കു മുൻപിൽ പ്രധാനമന്ത്രിക്കു പോലുമില്ല. മാത്രവുമല്ല, മാന്യശ്രീമാൻ ശശി തരൂർ ജനപ്രതിനിധിയുടെ കുപ്പായമിട്ട ശേഷം ആദ്യമുണ്ടാക്കിയ വിവാദം ദേശീയ ഗാനത്തോട് മര്യാദകേടു കാണിച്ചതിന്റെ പേരിലാണ്‌. ഭാരതഭരണഘടന പ്രാധാന്യത്തോടെ സൂക്ഷിക്കുന്നതും നിയമം കൊണ്ടു സംരക്ഷിച്ചിരിക്കുന്നതുമായ (Prevention of Insults to National Honour Act, 1971, Section 3b) ദേശീയഗാനത്തിനു പോലും അർഹമായ വില നൽകാത്ത ഒരാളുടെ സുപ്രീം കോടതി വിധിയെയും, രാഷ്ട്രപതിയുടെ തീരുമാനത്തെയും, രാജ്യതാൽപര്യത്തെയും സംബന്ധിച്ച പ്രസ്താവനയ്ക്ക് എന്തു പ്രസക്തി?

നിയമവിദഗ്ധരിൽ ഒന്നാമനായ രാം ജഡ്‌മലാനി, മാർക്കണ്ഡേയ കഡ്‌ജു തുടങ്ങിയവർക്കൊക്കെ വേണമെങ്കിൽ കോടതിയിൽ മേമനു വേണ്ടി ഹാജരാകാനുള്ള പൂർണ്ണസ്വാതന്ത്ര്യം ഇന്ത്യൻ ഭരണഘടന നൽകിയിട്ടുണ്ട്. നീണ്ട 21 വർഷങ്ങൾ മേമനും അയാളുടെ വക്കീലന്മാർക്കും മുൻപിൽ ഉണ്ടായിരുന്നു. ഇന്നിപ്പോൾ ഈ സെന്റി അടിക്കുന്ന കഡ്‌ജുവിനോ, മലാനിക്കോ ഒക്കെ വേണമെങ്കിൽ കേസിൽ കക്ഷി ചേരുകയോ നിയമവഴിയിലൂടെ അയാളെ സംരക്ഷിക്കുകയോ ചെയ്യാമായിരുന്നു. ഇതൊന്നുമല്ല, ചരിത്രത്തിലാദ്യമായി, അയാളെ തൂക്കിലേറ്റുന്നതിനു മണിക്കൂറുകൾക്കുള്ളിൽ വരെ -പാതിരാത്രിയിൽപ്പോലും!-  ബഹുമാനപ്പെട്ട കോടതി, അതിൻമേലുള്ള വാദം ഉദാരപൂർവ്വം കേൾക്കുകയും ചെയ്തതാണ്‌. 257 പേരെ അരുംകൊല ചെയ്ത പ്രതിക്കുവേണ്ടിയാണ്‌ കോടതി ഈ ഔദാര്യം കാട്ടിയതെന്നു കൂടി ഓർക്കണം. കാരണം ആയിരം കുറ്റവാളികൾ രക്ഷപ്പെട്ടാലും ഒരു നിരപരാധി പോലും ശിക്ഷിക്കപ്പെടരുതെന്നുള്ള ഭാരതത്തിന്റെ മാതൃകാപരവും, ഉത്കൃഷ്ടവുമായ നിയമവ്യവസ്ഥയുടെ മഹോന്നതമായ ആദർശം. ഇത്രയും കാലം തുടർന്ന വാദപ്രതിവാദങ്ങൾക്കു പുൻപിൽ ബഹുമാനപ്പെട്ട ന്യായാസനത്തിലിരുന്നത് ഈ കട്ജു തന്നെ ആയിരുന്നെങ്കിലും മറിച്ചൊരു വിധി പ്രസ്താവിക്കാൻ അയാൾക്കു കഴിയുമായിരുന്നില്ല. അത് അദ്ദേഹത്തിനും നന്നായി അറിയാവുന്ന കാര്യം തന്നെയാണ്‌. ഇതിപ്പോൾ അടുത്ത ഇലക്ഷനു നിക്കാൻ വല്ല പ്ലാനും കാണും. റിട്ടയർ ചെയ്തു വീട്ടിലിരിക്കുവല്ലേ... അതിന്റെ പേരിലുള്ള പ്രീണനരാഷ്ട്രീയവാദത്തിലുപരി മറ്റൊന്നുമായി തോന്നുന്നില്ല.

ഭാരതത്തിന്റെ നീതിന്യായവ്യവസ്ഥയും വ്യവഹാരനടപടികളും മുൻപോട്ടു പോകുന്നത് നിശിതവും, നിയതവുമായ, ലോകത്തിൽ ഇന്നു നിലവിലിരിക്കുന്നതിൽ ഏറ്റവും സമഗ്രമെന്നു തന്നെ പറയാവുന്നതും പല ലോകരാജ്യങ്ങളും കടം കൊണ്ടിട്ടുള്ളതുമായ ലിഖിതമായ നിയമാവലിയുടെ നൂൽപ്പാലത്തിലൂടെയാണ്‌. അവിടെ വ്യക്തിതാൽപര്യങ്ങൾക്കു പ്രസക്തിയില്ല. അതറിയുകയും, പ്രാക്ടീസ് ചെയ്യുകയും ചെയ്തിരുന്നവർ ഇത്തരത്തിൽ പറയുമ്പോൾ അതിൽ വ്യക്തമായ രാഷ്ട്രീയവും ഗൂഢമായ ലക്ഷ്യവും കാണാതിരിക്കാൻ കഴിയുന്നില്ല.

ഈ വിഷയത്തിൽ പലരും സംസാരിക്കുന്നത് അവ്യക്തമായതോ വികലമായതോ ആയ മനുഷ്യാവകാശബോധത്തിന്റെ ഭാഷയാണ്‌. ലോകത്തെ ഒരു രാജ്യത്തിന്റെയും നിയമസംഹിതകൾ അംഗീകരിക്കുന്ന തത്വമല്ല ഇത്. രണ്ടാമത്തെ കൂട്ടർ യെച്ചൂരിയെപ്പോലെയുള്ള രാഷ്ട്രീയക്കാരാണ്‌. അവരെ സംബന്ധിച്ചും രാഷ്ട്രീയലാഭം മുൻപിൽ വച്ചുള്ള പ്രീണന നയമെന്നതിലുപരി ഇതിന്‌ മറ്റൊരർത്ഥവും കൊടുക്കാൻ നിവൃത്തിയില്ല. കാരണം, സി പി എം ഭരണത്തിലിരുന്ന കാലഘട്ടങ്ങളിലും അല്ലാത്തപ്പൊഴും അവർ അഴിച്ചു വിട്ടിട്ടുള്ള അക്രമങ്ങളുടെയും, അരും കൊലകളുടെയും, മനുഷ്യാകാശധ്വംസനത്തിന്റെയും കണക്കെടുത്താൽ അത് രാജ്യം തൂക്കിലേറ്റിയ കുറ്റവാളികളേക്കാൾ എത്രയോ മടങ്ങു കൂടുതൽ വരും? കേരളത്തിൽ തന്നെ സി പി എമ്മിന്റെ കൊലപാതകരാഷ്ട്രീയത്തിന്റെ ഗ്രാഫ് എവിടെയെത്തി നിൽക്കുന്നു? അങ്ങനെയുള്ള അവരുടെ ഈ ആദർശപ്രസംഗത്തേക്കാൾ എത്രയോ സ്വാഗതാർഹമാണ്‌ തെരുവു വേശ്യയുടെ ചാരിത്ര്യപ്രസംഗം.

അഭിനവഭാരതത്തിന്റെ സാംസ്കാരികഭൂപടത്തിൽ അന്യം നിന്നു പൊയ്ക്കൊണ്ടിരിക്കുന്ന, രാഷ്ട്രീയ ഭാരതത്തിൽ രേഖപ്പെടുത്താവുന്ന ഒരു പ്രവർത്തി പോലും കാഴ്ചവയ്ക്കാൻ കഴിയാതെ പകച്ചു നിൽക്കുന്ന, കേരളത്തെ സംബന്ധിച്ചാണെങ്കിൽ പേരിനു പ്രതിപക്ഷക്കസേരകളിൽ വന്നിരുന്നു ബഹളം വച്ച് കാപ്പിയും കുടിച്ചു പിരിയാൻ മാത്രം വിധിക്കപ്പെട്ട ഇക്കൂട്ടരുടെ വിലാപത്തിന്‌ എന്തു വില നൽകണം? ആദ്യം പ്രതിപക്ഷധർമ്മം എന്തെന്ന് തിരിച്ചറിഞ്ഞു പ്രവർത്തിക്കട്ടെ. സഹപ്രവർത്തകരുടെ മനുഷ്യാവകാശങ്ങൾക്കു വില കൊടുക്കട്ടെ, സഹജീവികളെ കൊന്നൊടുക്കുന്നതു നിർത്തട്ടെ എന്നിട്ട് വലിയ വലിയ കാര്യങ്ങളെക്കുറിച്ചൊക്കെ പ്രസംഗിക്കാം. നഷ്ടപ്പെട്ട സ്വത്വം തിരികെപ്പിടിക്കാൻ ബീഫ് ഫെസ്റ്റും ചുംബനസമരവും, തീവ്രവാദികൾക്ക് ഐക്യദാർഢ്യവുമല്ല പകരം ക്രിയാത്മകമായ ജനസേവനവും, സുതാര്യമായ പ്രവർത്തനവും, നിർവ്യാജമായ ആദർശവുമാണാവശ്യമെന്ന് തിരിച്ചറിയുവോളം പൊതുജനം വളമിട്ടു വളർത്തുന്ന കള മാത്രമായി സി പി എം നിയമസഭയുടെ അകത്തളങ്ങളിൽ നോക്കുകുത്തിയായി അവശേഷിക്കും. ആദ്യം സ്വയം നന്നാവുക. പിന്നെ നന്നാക്കാം നാട്ടിലെ ജുഡീഷ്യറിയെ.

ഈ വിഷയത്തിൽ പ്രസ്താവനകളിറക്കുന്നതും മനുഷ്യാവകാശം പ്രസംഗിക്കുന്നതും ആരായാലും, അതിനി ബി ജെ പി നേതാവായാലും നരേന്ദ്രമോഡി തന്നെയായാലും രാജ്യതാൽപര്യങ്ങൾക്കു വിരുദ്ധമായി കാര്യങ്ങളുടെ സത്യസ്ഥിതിക്കും രാജ്യനീതിക്കും എതിരായി സംസാരിക്കുന്നവരെ വിഡ്ഢിയെന്നോ രാജ്യദ്രോഹിയെന്നോ വിളിക്കേണ്ടി വന്നാൽ പൗരബോധമുള്ള ഒരു വ്യക്തിയെന്ന നിലയിൽ അതിനു മടി കാണിക്കേണ്ട ആവശ്യമേയില്ല. യാക്കൂബ് മേമന്റെ മനുഷ്യാവകാശത്തെക്കുറിച്ചു വേവലാതിപ്പെടുന്നവർ 257 നിരപരാധികളുടെയും അവരുടെ ആശ്രിതരുടെയും മനുഷ്യാവകാശത്തെക്കുറിച്ച് ഒരു നിമിഷം പോലും ചിന്തിക്കാത്ത ജുഗൂപ്സാവഹമായ സാമൂഹ്യ-ധാർമ്മിക-ബൗദ്ധിക-നൈതിക അധഃപ്പതനം അത്ഭുതമാണുണ്ടാക്കുന്നത്.

നേരത്തെ മറ്റൊരു പോസ്റ്റിൽ വ്യക്തമാക്കിയതു പോലെ തന്നെ ഇവിടെ പ്രതി ഒരു നാരായണനോ, മത്തായിയോ ആണെങ്കിൽ പോലും എന്റെ നിലപാടിൽ മാറ്റമില്ല. രാജ്യതാൽപര്യത്തിൽ മതം കലർത്തുന്നത് ശുദ്ധ അസംബന്ധവും അവനവനിരിക്കുന്ന കൊമ്പു മുറിക്കുന്നതിനു തുല്യവുമാണ്‌. മറ്റൊരർത്ഥത്തിൽ ഇവരൊക്കെ ഈ പറയുന്നത് കോടതിയലക്ഷ്യമായി വിവക്ഷിക്കാവുന്നതാണ്‌.

ഇവർ അക്കമിട്ടു നിരത്തുന്ന ശിക്ഷിക്കപ്പെട്ടില്ലെന്നു സങ്കടപ്പെടുന്ന കുറേപ്പേരുടെ കാര്യത്തിലും ഇവരടക്കമുള്ളവർക്ക് കോടതിയെ സമീപിക്കാവുന്നതാണ്‌. മേമൻ തൂക്കുകയറിലേക്കു നടന്നടുത്ത അതേ നിയമത്തിന്റെ പാലത്തിലൂടെ തന്നെയാണ്‌ മറ്റവർ ശിക്ഷയിൽ നിന്നും ഒഴിവായത്. കോടതികൾ ഭരണകൂടങ്ങളുടെ ചട്ടുകമല്ല. കോൺഗ്രസ് ഭരിക്കുന്ന കാലഘട്ടത്തിലാണ്‌ നരേന്ദ്രമോഡിയടക്കമുള്ളവർ നിരുപാധികം കുറ്റവിമുക്തരായത്. അവർക്കെതിരേ കേസുണ്ടായിരുന്നു എന്നതു കൊണ്ട് അവർ ശിക്ഷാർഹരാണെന്നു പറയുന്ന ഇവരുടെ ചിന്തയും ബുദ്ധിയും എവിടെയാണ്‌? അതല്ല, അവർ കുറ്റവിമുക്തരായതിൽ ആക്ഷേപമുണ്ടെങ്കിൽ കോടതിയിൽ പോവുക. നിയമപരമായി അവരെ ശിക്ഷിപ്പിക്കാനുള്ള വഴി നോക്കുക. മദനിയുടെ മനുഷ്യാവകാശം പ്രസംഗിക്കുന്നവർ മദനി ശിക്ഷിക്കപ്പെടുന്നില്ല എന്ന് ആശ്വസിക്കാത്തതെന്ത്? ഇതൊരുതരം അന്ധമായ മതബോധത്തിൽ നിന്നും നീചമായ രാഷ്ട്രീയലാഭേച്ഛയിൽ നിന്നുമുണ്ടാകുന്ന നാശകാരണമായേക്കാവുന്ന അശുഭകരമായ ചിന്താരീതിയാണ്‌. 125 കോടി ജനങ്ങളുടെ സുരക്ഷയുടെയും ആത്മാഭിമാനത്തിന്റെയും പേരിൽ ഒരുത്തനെ കൊല്ലേണ്ടി വന്നാൽ അതു വേണം. അവൻ ഹിന്ദുവോ, ക്രിസ്ത്യനോ, മുസൽമാനോ ആരുമാവട്ടെ. അതുകൊണ്ടാണ്‌ നീതിദേവത കണ്ണു കെട്ടിയിരിക്കുന്നതെന്നു മനസ്സിലാക്കൂ...

എന്തും വിളിച്ചു കൂവാനുള്ള ലൈസൻസായി ഗ്രന്ഥരചനയെ കാണുന്നവർ

മുൻ ഐ പി എസ് ഉദ്യോഗസ്ഥനായിരുന്നു എന്നു പറയപ്പെടുന്ന എസ്. എം. മുഷ്‌രിഫ് എന്നൊരു മഹാൻ എഴുതിയ കർക്കരയെ കൊന്നതാര്‌ എന്നൊരു പുസ്തകം (ചവറ്‌) കയ്യിൽ കിട്ടി. മുംബൈ ഭീകരാക്രമണത്തിന്റെ നിഗൂഢതകൾ വെളിവാക്കുന്നുവെന്ന ടാഗ് ലൈനോടു കൂടിയ പത്തിരുനൂറ്റമ്പതോളം പേജുകൾ വരുന്ന ശുദ്ധ അസംബന്ധം അച്ചടിവർഗ്ഗീയവാദത്തിന്റെയും തീവ്രവാദോന്മുഖമായ അസത്യപ്രചാരണത്തിന്റെയും ഒന്നാന്തരം ഉദാഹരണമായാണ്‌ തോന്നിയത്.

കേന്ദ്ര ഇന്റലിജൻസ് ബ്യൂറോയെയും മറ്റു രഹസ്യാന്വേഷണ ഏജൻസികളെയും പ്രത്യക്ഷത്തിൽ അവഹേളിക്കുകയും വെല്ലുവിളിക്കുകയും ചെയ്തിരിക്കുന്ന പ്രസ്തുത (വി)കൃതി കഷ്ടപ്പെട്ടു സമർഥിക്കാൻ ശ്രമിച്ചിരിക്കുന്നത് താഴെ പറയുന്ന കാര്യങ്ങളാണ്‌.

1. മുംബൈ ഭീകരാക്രമണം സംഘപരിവാറിന്റെ - അതായത് ബ്രാഹ്മണരുടെ - ആസൂത്രണമായിരുന്നു.

2. മുംബൈ ഭീകരാക്രമണത്തിൽ കർക്കറെയെ കൊന്നത് കേന്ദ്ര ഇന്റലിജൻസ് ബ്യൂറോ ചുമതലപ്പെടുത്തിയ ബ്രാഹ്മണരായിരുന്നു

3. ഇന്റലിജൻസ് ബ്യൂറോ ബ്രാഹ്മണർ നയിക്കുന്ന ഹിന്ദുരാഷ്ട്രം കെട്ടിപ്പടുക്കാനുള്ള അജണ്ടയോടെ നടത്തുന്ന ഏജൻസിയാണ്‌.

4. അജ്മൽ കസബ് എന്ന ഭാരതം തൂക്കിലേറ്റിയ തീവ്രവാദിയെ നേപ്പാളിൽ നിന്ന് അറസ്റ്റ് ചെയ്യുകയായിരുന്നു.

5. അജ്മൽ കസബ് മുംബൈ ഭീകരാക്രമണത്തിൽ പങ്കെടുത്തിട്ടേയില്ല

6. കസബിനെ നേപ്പാളിൽ നിന്നു പിടി കൂടി ഈ ആക്രമണത്തിൽ പ്രതി ചേർക്കുകയായിരുന്നു.

7. കസബിന്റെ ചിത്രങ്ങൾ പോലും ഇന്റലിജൻസ് ബ്യൂറോ കൃത്രിമമായുണ്ടാക്കി തെളിവായി ചേർക്കുകയായിരുന്നു.

8. മുംബൈ ആക്രമണം നടത്തിയത് ഭാരതീയരായ ഹിന്ദു തീവ്രവാദികളായിരുന്നു.

9. മുംബൈ ഭീകരാക്രമണത്തിന്റെ ആകെ ലക്ഷ്യം കർക്കറെയെ കൊല്ലുക എന്ന ഇന്റലിജൻസ് ബ്യൂറോയുടെ -അഥവാ ബ്രാഹ്മണരുടെ- അജണ്ട മാത്രമായിരുന്നു.

10. അതിൽ സർക്കാരും, മാധ്യമങ്ങളും, കോടതിയും, അന്വേഷണ ഏജൻസികളുമെല്ലാം മനഃപ്പൂർവ്വം ഒരു സമുദായത്തെ താറടിച്ചു കാണിക്കാൻ വേണ്ടി നടത്തിയ ശ്രമമല്ലാതെ മറ്റൊന്നുമില്ല.

ഇവന്റെ തലക്കകത്ത് കളിമണ്ണാണെന്നല്ല ഏതോ കൂടിയ ഇനം വിഷമാണെന്നു വേണം പറയാൻ. ഇത്രയും പരസ്യമായി തോന്നിവാസം പടച്ചു വിട്ടിട്ട് ഇത് ശ്രദ്ധയിൽ പെടാഞ്ഞോ അതോ വില കൽപ്പിക്കേണ്ടതില്ലെന്നു കരുതിയോ ഇയാൾ അറസ്റ്റ് ചെയ്യപ്പെടാത്തത്? അജ്മൽ കസബ് തോക്കുമേന്തി ആക്രമണം അഴിച്ചു വിടുന്നതിന്റെ ഫോട്ടോയും വീഡിയോയും നാമെല്ലാം കണ്ടതാണ്‌. അവനെ നർക്കോ അനാലിസിസിനു വിധേയനാക്കുന്ന വീഡിയോ ഇപ്പൊഴും ഇന്റർനെറ്റിൽ ലഭ്യമാണ്‌. കോടതിയിലും, മറ്റ് ചോദ്യം ചെയ്യലുകളിലുമെല്ലാം അവൻ കുറ്റം സമ്മതിച്ചതുമാണ്‌. എന്നിട്ട് ഇയാൾ പറയുന്നു അവൻ നിരപരാധിയും, നേപ്പാളിൽ നിന്നു പിടി കൂടിയവനും, പോലീസ് കസ്റ്റഡിയിൽ വച്ച് കുറ്റം സമ്മതിപ്പിച്ചതുമാണെന്ന്‌.

ഇയാൾ ആരെയാണ്‌, ഏതു മുഖമാണ്‌ രക്ഷിക്കാൻ ശ്രമിക്കുന്നത്? ഇയാൾ എങ്ങനെ ഇത്ര കാലം പൊലീസ് സർവ്വീസിൽ ജോലി ചെയ്തു എന്നത് അത്യന്തം അത്ഭുതമുളവാക്കുന്നു. ഭാരതത്തെ ഞെട്ടിച്ച ഒരു കൊടും തീവ്രവാദിയെ വെള്ള പൂശിക്കൊണ്ട് ഒരു രാജ്യത്തെ നീതിന്യായവ്യവസ്ഥയെയും, ദേശീയ അന്വേഷണ ഏജൻസികളെയും കരി വാരിത്തേയ്ക്കാനും, ഒരു സമുദായത്തെ അപകീർത്തിപ്പെടുത്താനും മാത്രമുള്ളതായിരുന്നോ ഈ പുസ്തകം? അതുമല്ല മറ്റേതെങ്കിലും രഹസ്യ അജണ്ട ഇതിനു പിന്നിലുണ്ടോ? രാജ്യത്തെ ജനങ്ങളുടെയിടയിൽ തെറ്റിദ്ധാരണ പരത്താനും, അസ്വസ്ഥത നിറയ്ക്കാനുമുള്ള സംഘടിത ശ്രമങ്ങളോടു ചേർത്തു വായിക്കണം ഇത്തരം രാജ്യദ്രോഹപരമായ നീക്കങ്ങളെ.

സാധാരണ ഏതൊരു ഗ്രന്ഥകർത്താവും തന്റെ പുസ്തകത്തിൽ സ്വന്തം വിലാസവും, ഫോട്ടോയും രേഖപ്പെടുത്തുന്ന ഇക്കാലത്ത് ഇതു രണ്ടുമില്ലാതെ തലയും വാലുമില്ലാത്ത ഒരു പൊത്തകം പടച്ചു വിട്ടിരിക്കുന്ന ഭീരുത്വമാണ്‌ ഈ ചവറു ബുക്കിന്റെ ആകെ മൊത്തം മുഖലക്ഷണം. മലയാളത്തിൽ പ്രസിദ്ധീകരിച്ചിരിക്കുന്നതോ തേജസ്‌ പബ്ലിക്കേഷൻസ്‌. 120 രൂപാ കൊടുത്ത് ഈ അസംബന്ധം വാങ്ങി വായിച്ചവനൊക്കെ തലയ്ക്ക് ഓളമാണെന്നേ പറയാൻ നിവൃത്തിയുള്ളൂ.

ഗ്രന്ഥകർത്താവിനും, പ്രസാധകർക്കുമെതിരേ രാജ്യദ്രോഹത്തിനും, അപകീർത്തിക്കും ചുമത്താവുന്ന വകുപ്പുകളൊക്കെ ചുമത്തി കേസെടുക്കുകയാണ്‌ വേണ്ടത്.

‘ശ്രീ’ റബ്ബിനും ലീഗിനും അശ്രീകരമാണോ?

ഭാരതത്തിൽ ഇന്ന് പൊതുവിൽ വ്യക്തികളുടെ പേരിനോടൊപ്പം ആദരസൂചകമായി ചേർക്കുന്ന വാക്കാണ്‌ ശ്രീ, ശ്രീമാൻ, ശ്രീമതി തുടങ്ങിയവ.

ശ്രീ എന്ന വാക്ക് പൂർണ്ണമായും തന്ത്രശാസ്ത്രത്തിൽ നിന്നുത്ഭവിച്ചതാണ്‌. പ്രണവം അഥവാ ഓംകാരത്തെ പുരുഷബീജമന്ത്രമായും, ഹ്രീംകാരത്തെ സ്ത്രീബീജമന്ത്രമായും ഗണിച്ചു പോരുന്നു. അതായത് ഓംകാരം ശിവനും, ഹ്രീംകാരം ശക്തിയുമെന്നു സാരം.

വ്യക്തികളെ അഭിസംബോധന ചെയ്യുമ്പോൾ നാം ഉപയോഗിച്ചു വരുന്ന ശ്രീ ശബ്ദം ഹ്രീംകാരത്തിൽ നിന്നും ഉദ്ഭവിച്ചതാണ്‌. അഥവാ ഹ്രീംകാരം ലോപിച്ചാണ്‌ ശ്രീയുണ്ടായത്. മഹാലക്ഷ്മിയുടെ പര്യായമായും ശ്രീ ഉപയോഗിച്ചു വരുന്നു.

അതായത് പുരുഷശബ്ദത്തോടൊപ്പം ശ്രീ ശബ്ദം കൂടുമ്പോഴാണ്‌ പുരുഷൻ ആദരണീയനാവുന്നത്. എന്നു വച്ചാൽ സ്ത്രീയില്ലാതെ പുരുഷനില്ല, ശക്തിയില്ലാതെ ശിവനില്ല എന്ന തത്വം. സ്ത്രീയോടു കൂടി മാത്രമാണ്‌ പുരുഷൻ പൂർണ്ണതയിലെത്തുന്നത് എന്ന മഹദ്‌ദർശനമാണ്‌ ശ്രീ എന്ന പദം പുരുഷന്റെ പേരിനു മുൻപായി ആദ്യം ഉച്ചരിച്ചു കൊണ്ട് നാം ആവിഷ്കരിക്കുന്നത്. പുരുഷന്റെ പേരിനു മുൻപേ ആദ്യം ശ്രീശബ്ദം നൽകി സ്ത്രീയെ ആദരിക്കുക കൂടി ചെയ്തിരിക്കുന്നു.

ഇങ്ങനെയുള്ള തികച്ചും സനാതനധർമ്മത്തിൽ അടിസ്ഥാനമുള്ള, തന്ത്രജന്യമായ, ശാക്തേയസമ്പ്രദായത്തിലുള്ള ഉപാസനാപദ്ധതിയോടു വളരെ ചേർന്നു നിൽക്കുന്ന ശ്രീ എന്ന വിശേഷണത്തോടെ വിളിക്കപ്പെടുവാനും, അറിയപ്പെടുവാനും, ഹൈന്ദവോത്ഭവമായ നിലവിളക്കു കൊളുത്തുന്നതിൽ നിന്നും പിൻതിരിയുന്ന റബ്ബ് അടക്കമുള്ള ലീഗുകാർക്ക് പ്രശ്നം വല്ലതുമുണ്ടോ? ഉണ്ടെങ്കിൽ എന്തുകൊണ്ടാണ്‌ ഇന്നും പുറത്തു വരുന്ന ഫ്ലക്സുകളിലും, നോട്ടീസിലും, സർക്കാർ പരസ്യങ്ങളിൽപ്പോലും ഇപ്പോഴും ശ്രീ ചേർത്ത് ഇവരുടെ പേരുകൾ എഴുതുന്നത്? എന്റെ പേരിനോടൊപ്പം ഹിന്ദുക്കളുടെ ശ്രീ ചേർക്കണ്ടാ എന്നു പറയാനുള്ള ആർജ്ജവമുണ്ടോ ലീഗുകാർക്ക്? നിലവിളക്കിനേക്കാൾ ഹൈന്ദവതയോടു ചേർന്നു നിൽക്കുന്നതും, ഹൈന്ദവത മാത്രമായതുമാണ്‌ ശ്രീ. അതിനെയും വേണ്ടെന്നു വയ്ക്കൂ ആണത്തമുണ്ടെങ്കിൽ.

ഗുരുദേവനും കമ്യൂണിസ്റ്റുകളും

ശ്രീനാരായണഗുരുദേവനെക്കുറിച്ച് ഘോരഘോരം വാദിക്കുന്ന സി പി എമ്മുകാരെ കാണുമ്പോൾ ചിരിക്കണോ സഹതപിക്കണോ എന്നു മനസ്സിലാകുന്നില്ല. പ്രീണനരാഷ്ട്രീയത്തിനും സ്വജനപക്ഷപാതത്തിനും കുപ്രസിദ്ധവും, ഇന്നത്തെ സമൂഹത്തിൽ ഏറ്റവുമധികം ജാതി-മത ചിന്തകൾ കുത്തിക്കയറ്റി ഭിന്നിപ്പിച്ചു മുതലെടുക്കാൻ ശ്രമിക്കുന്ന ഏക രാഷ്ട്രീയകക്ഷിയുമായ സി പി എം തന്നെ പറയണം ഗുരുദേവന്റെ മാഹാത്മ്യം! ഇന്നത്തെ ദേശാപമാനിയിലുമുണ്ടായിരുന്നു കുറേ പേജ് വ്യാജവാർത്തകൾക്ക് അടിസ്ഥാനമുണ്ടാക്കാനായി ആത്മാർത്ഥതയുടെ കണിക പോലുമില്ലാത്ത സി പി എമ്മിന്റെ ഗുരുദേവാദർശപ്രസംഗം.

ഗുരുദേവൻ, ജാതി-മതങ്ങൾക്കുപരിയായി ചിന്തിക്കുകയും, ആ ചിന്താധാരയെ പ്രചരിപ്പിക്കുകയും ചെയ്ത ആൾ തന്നെയായിരുന്നു. എന്നാൽ ഒരിക്കലും സനാതനധാർമ്മികമൂല്യങ്ങളിൽ നിന്നും പരീക്ഷണാർത്ഥം പോലും വ്യതിചലിച്ചിട്ടില്ലാത്ത ഹൈന്ദവസന്യാസിയുമായിരുന്നു. നൂറു ശതമാനവും സനാതനധർമ്മി. മതപരിവർത്തനത്തെ നഖശിഖാന്തം എതിർത്തിരുന്ന ആൾ കൂടിയാണ്‌ ഗുരുദേവൻ. അതിന്റെ നിരവധി ഉദാഹരണങ്ങളിലൊന്നാണ്‌, ഗുരുദേവന്റെ അനുഗ്രഹാശിസ്സുകളോടെ, അദ്ദേഹത്തിന്റെ ഇച്ഛാനുസാരം ശ്രീ കുമാരനാശാൻ രചിച്ച, മതപരിവർത്തന രസവാദമെന്ന ലഘുഗ്രന്ഥം. സ്വജാതിയിൽ ഉള്ളവരുടെ പോലും മതപരിവർത്തനോത്സുകതയെ യുക്തായുക്തം ഖണ്ഡിക്കുകയും, നിരുൽസാഹപ്പെടുത്തുകയും ചെയ്യുക മാത്രമല്ല സനാതനധാർമ്മികമൂല്യങ്ങളെയും, അതിന്റെ ഉത്കൃഷ്ടവശങ്ങളെയും വസ്തുതാപരമായി മഹത്വപ്പെടുത്തുക കൂടി ചെയ്തിട്ടുണ്ട് അതിൽ. അതു കൂടാതെ തന്നെ, ഗുരുദേവന്റെ കാലത്തു തന്നെ, മതപ്രബോധനത്തിനായി എസ് എൻ ഡി പി യോഗം കടുത്ത സാമ്പത്തികപരാധീനതകളെ നേരിടുന്ന അവസരത്തിൽ പോലും പണം ചിലവാക്കി പണ്ഡിതന്മാരെയും നിയോഗിച്ചു പോന്നു.

ഗുരുദേവദർശനങ്ങളിലോ, സൂക്തങ്ങളിലോ ഒന്നിൽപോലും സനാതനധർമ്മത്തെ പുകഴ്ത്തുകയും, വാഴ്ത്തുകയും പരമതപ്രവേശത്തെ ശക്തിയുക്തം നിരുൽസാഹപ്പെടുത്തുകയുമല്ലാതെ ചെയ്തിട്ടില്ല. ഗുരുദേവൻ സനാതനധർമ്മിയായിരുന്നു. എന്നാൽ ഗുർദേവദർശനങ്ങൾ ലോകത്തിനു മുഴുവൻ ശ്രേയസ്കരവുമായിരുന്നു. പലമതസാരവുമേകമെന്നേ ഗുരുദേവൻ അരുളിച്ചെയ്തിട്ടുള്ളൂ. അല്ലാതെ പല മതവും ഏകമെന്നോ ഒന്നു മറ്റൊന്നിനേക്കാൾ ഉത്കൃഷ്ടമെന്നോ പറഞ്ഞിട്ടില്ല. അതുമല്ല, സ്വധർമ്മത്തിന്റെ ഔന്നത്യത്തെ ധാരാളമായി പ്രബോധനം ചെയ്തിട്ടുമുണ്ട്. സ്വന്തം മതത്തെക്കുറിച്ച് ആധികാരികമായി ഒന്നും പറയാനില്ലാത്തവനാണ്‌ മറ്റു മതത്തെ കുറ്റപ്പെടുത്തുകയും ഇകഴ്ത്തുകയും ചെയ്യുന്നത്. ഗുരുദേവന്‌ അതിന്റെ ആവശ്യമില്ലായിരുന്നു. മാത്രവുമല്ല ഒരു യോഗിവര്യന്റെ മാർഗ്ഗവും അതല്ല. അതുകൊണ്ടു തന്നെ മറ്റു മതങ്ങളുടെ കുറവുകൾ തേടി നടക്കാത സ്വധർമ്മത്തിന്റെ മേന്മകളെ അനുഷ്ഠിക്കുകയും, പഠിപ്പിക്കുകയും ചെയ്തു ഗുരുദേവൻ. ശ്രീനാരായണഗുരുദേവവിരചിതമായ എല്ലാ കീർത്തനങ്ങളും, ശ്ലോകങ്ങളും സനാതനധർമ്മസിദ്ധാന്തങ്ങളിൽ ആഴത്തിൽ വേരുള്ളവയുമായിരുന്നു. അങ്ങനെയുള്ള ഗുരുദേവൻ സനാതനധർമ്മിയല്ലായിരുന്നു എന്നൊക്കെ പ്രത്യക്ഷത്തിലും പരോക്ഷത്തിലും സ്ഥാപിക്കാൻ ശ്രമിക്കുന്നവരുടെ ഉദ്ദേശലക്ഷ്യങ്ങൾ ദുരൂഹവും, അപകടകരവുമാണ്‌.

അവിടം കൊണ്ടും രക്ഷയില്ലെന്നു കണ്ട് ഗുരുദേവവിഗ്രഹങ്ങൾ തച്ചുടയ്ക്കുകയും, അത് സംഘപരിവാറിന്റെ തലയിൽ കെട്ടി വയ്ക്കാൻ ശ്രമിക്കുകയും ചെയ്യുന്ന രാഷ്ട്രീയ ക്രിമിനലിസവും, ആശയപാപ്പരത്തവും സി പി എമ്മിനു മാത്രം അവകാശപ്പെട്ടതും, അവർ പണ്ടേ തുടർന്നു വന്നതുമായ പാരമ്പര്യമാണ്‌.

എസ് എൻ ഡി പിയുടെ ഉത്കർഷത്തെക്കുറിച്ചോർത്തുള്ള അടങ്ങാത്ത ആശങ്കയൊന്നുമല്ല, പ്രത്യുത, നഷ്ടപ്പെട്ടു പോകുന്ന ഭീമമായ വോട്ടുകൾ മാത്രമാണ്‌ സി പി എമ്മിന്റെ ഇന്നത്തെ വിഷയം. അത് സാമാന്യബുദ്ധിയുള്ള ആർക്കും മനസ്സിലാവുന്നതുമാണ്‌. ഇന്നിന്റെ സാഹചര്യത്തിൽ ഇത്തരത്തിൽ ഗുരുദേവപ്രതിമ തകർക്കുകയോ അക്രമം നടത്തുകയോ ചെയ്യേണ്ട സാഹചര്യം സംഘപരിവാറിനെന്നല്ല മറ്റൊരു സംഘടനയ്ക്കുമില്ല. അത് സി പി എമ്മിന്റെ നിലനിൽപ്പിനു വേണ്ടിയുള്ള നാടകം മാത്രമാണെന്ന് മനസ്സിലാക്കാൻ ഈയൊരൊറ്റക്കാരണം മതി. മാത്രവുമല്ല സംഘപരിവാറിന്റെ സംസ്കാരവും, ഗുരുക്കന്മാരെയും അവരുടെ സ്മാരകങ്ങളെയും സംരക്ഷിക്കുകയെന്നതല്ലാതെ നശിപ്പിക്കുകയെന്നതല്ല. അക്രമവും, കൊള്ളിവയ്പ്പും സ്വാർത്ഥലാഭത്തിനു വേണ്ടിയുള്ള നശീകരണവൃത്തിയും സി പി എമ്മിന്റെ മാത്രം കുത്തകയാണെന്നത് നിരവധി തവണ തെളിയിക്കപ്പെട്ടിട്ടുള്ളതും അവസരം കിട്ടിയിട്ടുള്ളപ്പോഴൊക്കെ അവരുടെ തന്നെ നേതാക്കന്മാർ അതു വിളിച്ചു പറഞ്ഞിട്ടുള്ളതുമാണെന്നതു കൂടി ചേർത്തു ചിന്തിക്കുമ്പോൾ ചിത്രം പൂർണ്ണമായി.

എൻ എസ് എസ് നേതൃത്വം ഓർമ്മിക്കാൻ

എൻ എസ് എസ് കോളേജിലെ നിയമനത്തിന്‌ പന്ത്രണ്ടു ലക്ഷം രൂപ നിരുപാധികം ആവശ്യപ്പെട്ടതു സംബന്ധിച്ച എന്റെ ഫേസ് ബുക്ക് പോസ്റ്റ് സമുദായത്തെ വേദനിപ്പിക്കുന്നതും, മലർന്നു കിടന്നു തുപ്പുന്നതിനു തുല്യവുമാണെന്ന് യൂണിയൻ സെക്രട്ടറി.

പിന്നല്ലാതെ എന്തു ചെയ്യണമായിരുന്നു നായർ സാർ? സാറു പറഞ്ഞതു പോലെ സുകുമാരൻ നായർ സാറിന്റെ അടുത്തു പോയി ചോദിച്ചാൽ എന്തു സംഭവിക്കുമായിരുന്നു? വെറുതേ ഒന്നു കാണാൻ കയറിയ സുരേഷ് ഗോപിയുടെ അനുഭവം ആരും മറന്നിട്ടില്ല. അതവിടെ നിൽക്കട്ടെ.

യൂണിയൻ സെക്രട്ടറിയുടെ വാദം, മന്നത്തപ്പൂപ്പൻ ഉള്ള കാലം മുതൽ എൻ എസ് എസ് നിയമനത്തിനു പണം വാങ്ങാറുണ്ട്. അതുപോലെ ഇപ്പോഴും ചെറിയൊരു സംഭാവന ആവശ്യപ്പെട്ടു എന്നാണ്‌. ഒരു ശരാശരി നായർക്ക് പന്ത്രണ്ടു ലക്ഷം രൂപ അങ്ങു പറഞ്ഞതു പോലെ ‘നിസ്സാരമായ - ചെറിയൊരു' തുകയാണെങ്കിൽ പിന്നെ സാമ്പത്തിക സംവരണമെന്നൊക്കെ പറഞ്ഞ് എൻ എസ് എസ് തന്നെ കയ്യടി വാങ്ങാൻ ശ്രമിക്കുന്നതിൽ എന്ത് ആത്മാർത്ഥതയാണുള്ളത്?

ഇത്തരം വിഷയങ്ങൾ പൊതുമാധ്യമങ്ങളിൽ ചർച്ച ചെയ്യപ്പെടുന്നതിനെ നേതൃത്വം ഭയക്കുന്നതെന്തിന്‌? അധികാരിവർഗ്ഗമല്ലാതെ മറ്റൊരു കുഞ്ഞു പോലും എന്റെ കത്തിനെ എതിർത്തോ സമുദായനേതൃത്വത്തിനെ ന്യായീകരിച്ചോ കണ്ടില്ലല്ലോ. അധികാരിവർഗ്ഗത്തിൽ തന്നെ കൃത്യമായി പറഞ്ഞാൽ അങ്ങുൾപ്പെടെ മൂന്നേ മൂന്നു പേരാണ്‌ നേതൃത്വത്തെ ന്യായീകരിച്ചത്. മറ്റുള്ളവരെല്ലാം മൗനം ദീക്ഷിക്കുകയോ യോജിപ്പു പ്രകടിപ്പിക്കുകയോ ആയിരുന്നു. ഈ വിഷയത്തിൽ നേതൃത്വത്തിന്റെ നിലപാട്‌ ശരിയാണ്‌ എന്ന് നൂറു ശതമാനം അങ്ങേയ്ക്കോ മറ്റാർക്കെങ്കിലുമോ ഉറപ്പുള്ള പക്ഷം ഇതാ ഈ പൊതു മാധ്യമത്തിൽ ഒരു തുറന്ന ചർച്ചയ്ക്കു ക്ഷണിക്കുന്നു. എന്താ പോരുന്നോ??? എന്റേതു തെറ്റിദ്ധാരണയാണെങ്കിൽ തിരുത്താൻ ഞാൻ തയ്യാറാണ്‌. നിങ്ങളുടേത് തെറ്റായ നയസമീപനമാണെങ്കിൽ തിരുത്താൻ നിങ്ങൾ തയ്യാറാകുമോ?

ഞാനെന്ന നായർ മലർന്നു കിടന്നു തുപ്പിയാൽ എന്റെ മുഖത്തു വീണതിന്റെ ബാക്കിയേ നിങ്ങളുടെയൊക്കെ ദേഹത്തു വീഴുള്ളൂ സർ. കാരണം, ഞാൻ നേരിൽ സൂചിപ്പിച്ചതു പോലെ തന്നെ ഇന്നത്തെ വില നോക്കിയാൽ ഒരു കോടിയോ അതിനു മുകളിലോ വില വരുന്ന തറവാട്ടുമുതൽ സമുദായോദ്ധാരണത്തിന്‌ ഇഷ്ടദാനം കൊടുത്ത പാരമ്പര്യമുള്ളവൻ അതേ സമുദായത്തിന്റെ അപചയത്തെ വിമർശിക്കുന്നത് മലർന്നു കിടന്നു തുപ്പലാണെങ്കിൽ ആ തുപ്പൽ കൂടുതൽ വീഴുന്നത് അവന്റെ മുഖത്തു തന്നെയാണ്‌. അല്ല, സമുദായനേതൃത്വം സമുദായാംഗങ്ങളോട് അക്ഷരാർത്ഥത്തിൽ ചെയ്യുന്നതും അതു തന്നെയാണല്ലോ... മുഖത്തു കാർക്കിച്ചു തുപ്പൽ...

ഞങ്ങൾ ഇനിയും ഈ വ്യവസ്ഥിതിയോടു പൊരുതുക തന്നെ ചെയ്യും. നായന്മാർ നന്നാകുമെന്നുള്ള പ്രതീക്ഷകൊണ്ടൊന്നുമല്ല. പക്ഷേ ഞങ്ങൾ പൊരുതി വീഴുന്നതു വരെയും പറയും. ഇന്നു മന്നത്തപ്പൂപ്പനുണ്ടായിരുന്നെങ്കിൽ അദ്ദേഹം മറ്റൊരു വിമോചനസമരം നടത്തിയേനേ. ഈ ചീഞ്ഞുനാറിയ വ്യവസ്ഥിതിയിൽ നിന്നും നേതൃത്വത്തിൽ നിന്നും താൻ പടുത്തുയർത്തിയ എൻ എസ് എസ്സിനെ രക്ഷിക്കാനായി. മരിച്ചുവീഴുമെങ്കിൽ അതു യുദ്ധഭൂമിയിലെന്ന പ്രഘ്യാപിതവ്രതത്തെ ഉപാസിക്കുന്ന നായന്മാരെ കണ്ടിട്ടുണ്ടോ നേതാക്കന്മാർ? പുതുതായി പൊട്ടിമുളച്ച ആദർശബോധമൊന്നുമല്ല ഞങ്ങൾക്കത്. പണ്ടുമുണ്ടായിരുന്നു അങ്ങനെയുള്ള നായന്മാർ... പെരുന്നയിലുള്ളവർക്ക് നായന്മാരെക്കുറിച്ച് അത്ര പിടിയില്ലാഞ്ഞിട്ടാണ്‌.